रक्सौल, पूर्वी चम्पारण
प्रशंसनीय बुद्धिमत्ता त्यही हो, जसले दूरदर्शी विवेक, अनुशासन, शिष्टाचार र मानव मर्यादाको सम्मान गर्न सिकाउँछ। बुद्धिमत्ता केवल ज्ञान वा सीपमा सीमित नभई सही–गलत छुट्याउने क्षमता, आफ्नो कर्मको परिणामबारे सचेत रहने सोच र वास्तविकता बुझ्ने विवेकसँग जोडिएको हुनुपर्छ।
लायन्स क्लब अफ रक्सौलका अध्यक्ष, मिडिया प्रभारी, भारत विकास परिषद् रक्सौलका सेवा संयोजक तथा सामाजिक अभियन्ता बिमल सर्राफ ले पत्रकारहरूसँग कुरा गर्दै यस्ता विचार व्यक्त गरेका हुन्। उनले सीप र क्षमताको दुरुपयोग गर्ने व्यक्तिलाई बुद्धिमान नभई धूर्त भन्न सकिने बताए।
उनका अनुसार साँचो बुद्धिमान व्यक्ति आफ्नो कर्मप्रति जिम्मेवार हुन्छ। उसले सही र गलतको पहिचान गर्न सक्छ, आफ्नो उपलब्धिलाई समाज र मानव कल्याणका लागि उपयोग गर्न जान्दछ। तर विडम्बना, धेरै मानिस ज्ञान र क्षमताले सम्पन्न हुँदाहुँदै पनि आफ्नो हित र अहित छुट्याउन असफल हुने गरेका छन्।
उनले मानिसहरू प्रायः तत्काल लाभ देखिने तर अन्ततः हानिकारक हुने काममा आफ्नो समय, सीप र ऊर्जा खर्च गर्ने गरेको उल्लेख गरे। बुद्धिमत्ता वास्तविकता बुझ्ने, दूरदर्शी सोच राख्ने तथा असल विचार र सदाचारको बाटोमा अघि बढ्ने माध्यम बन्नुपर्ने उनको धारणा थियो।
उनले धार्मिक आस्था केवल शब्दमा सीमित नभई व्यवहारमा देखिनुपर्ने बताए। व्यक्तिले आफूलाई अनुशासित, संयमी र अरूप्रति उदार बनाउँदै मानवता, सेवा र नैतिकताको मार्गमा अघि बढ्नुपर्ने उनको भनाइ थियो।
मानिसले आत्मबोध, विवेक र सकारात्मक सोचमार्फत आफ्नो जीवनको दिशा परिवर्तन गर्न सक्दा मात्र वास्तविक बुद्धिमत्ताको उदय हुने बिमल सर्राफले बताए।
