बिरगञ्ज । बिरगञ्ज महानगरपालिकामा सरसफाइ कर्मीहरूले तलब वृद्धि लगायत विभिन्न माग राख्दै आइतबारदेखि आन्दोलन सुरु गरेपछि कार्यवाहक मेयर इम्तियाज आलम समस्याको समाधानका लागि सक्रिय रूपमा जुट्नुभएको छ। आन्दोलनका कारण घण्टाघर चोक तथा महानगरपालिकाको मूल गेट अगाडि फोहोर थुपारेर विरोध प्रदर्शन गरिएपछि उहाँले घटनालाई गम्भीर रूपमा लिँदै तत्काल आवश्यक पहल गर्नुभएको हो।
कार्यवाहक मेयर आलमले सरसफाइ व्यवस्थापनको जिम्मा लिएको ठेकेदार कम्पनीका सञ्चालक शिव गुप्तालाई तत्काल कार्यालयमा बोलाई सरसफाइ कर्मीहरूको जायज मागबारे गम्भीर छलफल गर्न तथा यथाशीघ्र समाधान निकाल्न स्पष्ट निर्देशन दिनुभएको छ। उहाँले श्रमिकका समस्या समाधान गर्दै नगरको नियमित सरसफाइ सेवा कुनै पनि हालतमा अवरुद्ध हुन नदिन विशेष जोड दिनुभएको छ।
आलमले महानगरको सेवा प्रवाह जनताको आधारभूत अधिकारसँग जोडिएको विषय भएकाले सरसफाइ जस्तो संवेदनशील क्षेत्रमा कुनै लापरबाही स्वीकार्य नहुने स्पष्ट पार्नुभएको छ। श्रमिकका जायज माग सम्बोधन गर्दै नगरवासीले कुनै प्रकारको सास्ती बेहोर्नु नपरोस् भन्ने उद्देश्यले महानगरपालिका निरन्तर समन्वय र सहजीकरणमा लागेको उहाँको भनाइ छ।
उहाँले आन्दोलनरत सरसफाइ कर्मी र ठेकेदार कम्पनी दुवै पक्षसँग संवादमार्फत सहमतिमा पुग्ने वातावरण बनाउन महानगरपालिकाले सक्रिय भूमिका निर्वाह गरिरहेको जानकारी दिनुभयो। आवश्यक परे थप छलफल, समन्वय तथा प्रशासनिक पहलमार्फत समस्या समाधान गरिने उहाँले विश्वास व्यक्त गर्नुभयो।
कार्यवाहक मेयर आलमका अनुसार बिरगञ्जको सरसफाइ सेवा नियमित, प्रभावकारी र व्यवस्थित बनाइराख्न महानगरपालिका पूर्ण रूपमा प्रतिबद्ध छ। आन्दोलनका कारण नगरको वातावरण, जनस्वास्थ्य तथा दैनिक जनजीवनमा नकारात्मक असर पर्न नदिन महानगरले आवश्यक सबै कदम चाल्ने उहाँले बताउनुभयो।
यसैबीच, महानगरपालिकाले सम्बन्धित सबै पक्षलाई जिम्मेवार र संयमित भएर वार्तामार्फत समस्याको समाधान खोज्न आग्रह गरेको छ। नगरवासीलाई सहज, स्वच्छ र सुरक्षित वातावरण उपलब्ध गराउने महानगरपालिकाको दायित्व भएकाले सरसफाइ सेवा कुनै पनि परिस्थितिमा लामो समय प्रभावित हुन नदिने प्रतिबद्धता कार्यवाहक मेयर इम्तियाज आलमले व्यक्त गर्नुभएको छ।
