मिथिला नगरपालिका–९, लालगढ स्थित माता दुर्गा भगवती मन्दिरको उदघाटन गरिएको छ । नेपाल प्रहरी विशेष सुरक्षा गण ढल्केवरको प्रहरी उपरीक्षक भुवनेश्वर प्रसाद साहद्वारा दुर्गा मन्दिरको उदघाटन गरिएको हो ।
प्रहरी कर्मचारी लगायत स्थानीयको सहभागीतामा कलश यात्रा सहित प्राण–प्रतिष्ठा पूजा सम्पन्न गरी विधिवत् रूपमा मन्दिरको उद्घाटन गरिएको प्रहरी उपरीक्षकले बताए ।
पवित्र धार्मिक तथा पुण्य कार्यमा मन्दिर निर्माणका लागि सहयोग, समर्पण तथा योगदान गर्नु हुने सम्पूर्ण सहयोगी दाताहरूलाई प्रहरी उपरीक्षक साहले धन्यवाद व्यक्त गरेका थिए ।
साथै प्राण–प्रतिष्ठा पूजा एवं विधिवत् उद्घाटन समारोहमा सहभागी हुनु भएका प्रमुख अतिथि, विशेष अतिथि, अतिथि, जनप्रतिनिधि, समाजसेवी, बुद्धिजीवी, भक्तजनहरु प्रति हार्दिक आभार, कृतज्ञता तथा धन्यवाद उनले व्यक्त गरेका थिए ।
मन्दिर निर्माण हेतु सहयोग, सद्भाव, सहभागिता र समर्पण प्रति सधैँ आभारी रहने साहले बताए । माता दुर्गा भगवतीको कृपा एवं आशीर्वाद सदैव सबैमा रहोस, ‘समाजमा सुख, शान्ति, समृद्धि, आपसी सद्भाव, एकता र धार्मिक सहिष्णुता कायम रहोस’ भन्ने हार्दिक कामना समेत प्रहरी उपरीक्षक साहले गरेका थिए ।
प्रहरी उपरीक्षक साहले २०८२ मंसिर १८ गते आफैले शिलान्यास गरेको दुर्गा मन्दिरलाई आफ्नो लगनशिलताले आफ्नै कार्यकालमा उदघाटन गर्न समेत सफल भएका छन।
स्थानिय ७० वर्षीय बुनिमैयाका अनुसार प्रहरी उपरीक्षक साहको स्थानीयसंगको लगावले कहिले पनि पदको घमन्ड नरहेको महसुस भएको बताईन । उनको व्यवहारले नै सबैले मन्दिर निर्माणमा हातेमालो गरेको सुनाईन । अहिलेको परिवेशमा समाजलाई यस्तै अधिकृत आवश्यक रहेको बताईन ।
