घरमै पार्किङ गरिएको ई–स्कुटरको ब्याट्री पड्किँदा करिब ५ लाख रुपैयाँ बराबरको क्षति भएको दाबी, जिल्ला प्रशासन कार्यालय पर्सामा निवेदन दर्ता।
समाचारमा प्रस्तुत विवरणअनुसार, वीरगञ्जस्थित कुशवाहा मोटर्सले जिल्ला प्रशासन कार्यालय पर्साको निर्देशनसमेत बेवास्ता गरेको आरोप लागेको छ। केही दिनअघि सो कम्पनीबाट खरिद गरिएको एउटा ई–स्कुटरमा आगलागी भएपछि छलफलका लागि प्रशासनले दुई पटक समय तोकेर बोलाए पनि कम्पनीका सञ्चालक उपस्थित नभएको पीडित प्रदीप साहले बताएका छन्।
पीडित साहले घटनासम्बन्धी जिल्ला प्रशासन कार्यालय पर्सामा निवेदन दर्ता गर्दै आवश्यक छानबिन, क्षतिपूर्ति तथा कानुनी कारबाहीको माग गरेका छन्।
निवेदनअनुसार २०८३ जेठ २१ गते बिहान करिब ७:४० बजे उनका बुबा किशन साह कानुको नाममा दर्ता रहेको म.प्र.०३–०३९ प १४४३ नम्बरको ई–स्कुटर घरभित्र पार्किङ गरिएको अवस्थामा अचानक ब्याट्री पड्किएर आगलागी भएको थियो।
आगलागीबाट ई–स्कुटर पूर्ण रूपमा जलेर नष्ट हुनुका साथै आगो घरको प्यासेज, भुइँतल्लाको कोठा, विद्युत् लाइन, सम्पूर्ण वायरिङ तथा इन्टरनेट राउटरसम्म फैलिएको निवेदनमा उल्लेख गरिएको छ।
पीडितका अनुसार उक्त घटनाबाट करिब ५ लाख रुपैयाँ बराबरको क्षति भएको छ। आगलागी भएको ई–स्कुटर वीरगञ्जस्थित कुशवाहा मोटर्सबाट खरिद गरिएको भन्दै विक्रेता पक्षलाई जिम्मेवार ठहर गरी कानुनबमोजिम क्षतिपूर्ति दिलाइदिन प्रशासनसँग माग गरिएको छ।
साथै, विक्रेता पक्षलाई उपस्थित गराई घटनाको निष्पक्ष छानबिन, क्षतिको यथार्थ मूल्याङ्कन तथा कानुनअनुसार क्षतिपूर्ति उपलब्ध गराउन पनि पीडितले जिल्ला प्रशासन कार्यालयमार्फत अनुरोध गरेका छन्।
