रक्सौल। राष्ट्रगीत ‘वन्दे मातरम्’ रचना भएको १५० वर्ष पूरा भएको गौरवपूर्ण अवसर तथा अगस्त क्रान्ति दिवसको सन्दर्भमा भारत विकास परिषद्, रक्सौल शाखाको आयोजनामा आगामी साउन २४ गते (९ अगस्ट) भव्य सामूहिक सांगीतिक ‘वन्दे मातरम्’ गायन समारोह आयोजना हुने भएको छ।
कार्यक्रम बिहान ११ बजे रक्सौलको पोस्ट अफिस रोडस्थित श्रीराम जानकी मन्दिर परिसरमा रहेको नटराज सेवा संगमको कार्यालयमा आयोजना हुनेछ।
कार्यक्रमको उद्देश्य ‘वन्दे मातरम्’को गौरवशाली इतिहास र विरासतलाई नयाँ पुस्तासम्म पुर्याउनुका साथै राष्ट्रभक्ति, सांस्कृतिक चेतना तथा राष्ट्रिय एकताको भावनालाई थप सुदृढ बनाउनु रहेको आयोजकले जनाएको छ। सामूहिक रूपमा ‘वन्दे मातरम्’ प्रस्तुत गर्दै मातृभूमिप्रति श्रद्धा, सम्मान र समर्पणको सन्देश प्रवाह गरिनेछ।
समारोहमा श्रीराम जानकी म्युजिकल ग्रुपकी सञ्चालिका तथा चर्चित भजन गायिका जूही राजको सहयोगमा सांगीतिक प्रस्तुति रहनेछ। साथै मोतिहारी जिल्ला विद्यालयका संगीत शिक्षक तथा संगीत गुरु सञ्जय कुमार दासको संयोजन र संगीत निर्देशनमा सामूहिक गायन प्रस्तुत गरिनेछ।
भारत विकास परिषद्, रक्सौल शाखाका अध्यक्ष रजनीश प्रियदर्शी, सचिव नरेश कुमार तथा कार्यक्रम संयोजक अजय कुमारले ‘वन्दे मातरम्’का अमर स्रष्टा बंकिमचन्द्र चट्टोपाध्यायलाई श्रद्धापूर्वक स्मरण गर्दै भावपूर्ण श्रद्धाञ्जली अर्पण गरिने जानकारी दिएका छन्।
उनीहरूले स्वतन्त्रता आन्दोलनका क्रममा ‘वन्दे मातरम्’ राष्ट्रभक्तिको सशक्त प्रेरणास्रोत बनेको उल्लेख गर्दै आज पनि यसले भारतीय नागरिकको मनमा मातृभूमिप्रतिको प्रेम, सम्मान र समर्पणको भावना जागृत गराउँदै आएको बताए।
कार्यक्रममा भारत विकास परिषद्, रक्सौल शाखाका पदाधिकारी तथा सदस्यहरू, नटराज सेवा संगमका पदाधिकारी तथा सदस्यहरू, सरस्वती विद्या मन्दिरका विद्यार्थी तथा नगरका विभिन्न क्षेत्रका विशिष्ट व्यक्तिहरूको सहभागिता रहनेछ।
परिषद्ले ‘वन्दे मातरम्’ रचना भएको १५० वर्ष पूरा भएको यस ऐतिहासिक अवसरलाई व्यापक जनसहभागिताका साथ अविस्मरणीय बनाउने लक्ष्य लिएको जनाएको छ।
भारत विकास परिषद्, रक्सौल शाखाका सेवा संयोजक तथा सञ्चार प्रभारी बिमल कुमार सर्राफले कार्यक्रम केवल सांगीतिक प्रस्तुति मात्र नभई राष्ट्रभक्ति, भारतीय संस्कृति तथा राष्ट्रिय गौरवप्रतिको सामूहिक आस्था र समर्पणको सशक्त अभिव्यक्ति भएको बताए। उनले नगरवासीलाई ठूलो संख्यामा उपस्थित भई कार्यक्रम सफल बनाउन आग्रह गरेका छन्।
कार्यक्रमसम्बन्धी जानकारी भारत विकास परिषद्, रक्सौल शाखाका सम्पर्क संयोजक उमेश सिकारिया तथा सेवा संयोजक एवं सञ्चार प्रभारी बिमल कुमार सर्राफले संयुक्त रूपमा दिएका हुन्।
