रक्सौल । भारतीय भूमि पत्तन प्राधिकरणअन्तर्गतको भूमि पत्तन रक्सौल परिसरमा शनिबार ८०औँ स्वतन्त्रता दिवस हर्षोल्लास र देशभक्तिपूर्ण वातावरणमा मनाइएको छ। समारोहका प्रमुख अतिथि भारतीय भूमि पत्तन प्राधिकरणका उपसचिव मधुकर पाण्डेले राष्ट्रिय झण्डा फहराउँदै कार्यक्रमको शुभारम्भ गर्नुभएको थियो। राष्ट्रिय झण्डाको सम्मानमा उपस्थित सहभागीहरूले ‘वन्दे मातरम्’ र राष्ट्रिय गान प्रस्तुत गर्दै देशभक्तिको भावना व्यक्त गरेका थिए।
झण्डोत्तोलनपछि प्रमुख अतिथि पाण्डेले स्वतन्त्रता दिवसको शुभकामना व्यक्त गर्दै क्षेत्रको विकास तथा भारत–नेपाल व्यापारिक सम्बन्धलाई थप सुदृढ बनाउन भूमि पत्तन रक्सौलको महत्वपूर्ण भूमिका रहेको बताउनुभयो।
समारोहमा भारत–नेपाल मैत्री तथा सीमापार सद्भावको समेत झल्को देखिएको थियो। नेपालतर्फको वीरगन्ज एकीकृत जाँच चौकी (आईसीपी) का टर्मिनल प्रमुख गणेश घिमिरे आफ्ना सहकर्मीहरूसहित समारोहमा सहभागी हुनुभएको थियो। नेपाल सशस्त्र प्रहरी बल (एपीएफ), वीरगन्ज आईसीपीका प्रहरी नायब उपरीक्षकसहित रक्सौलका विभिन्न गैरसरकारी संस्थाका प्रतिनिधि तथा सञ्चारकर्मीहरूको पनि उपस्थिति रहेको थियो।
समारोहमा भूमि पत्तन रक्सौलसँग सम्बन्धित भन्सार, अध्यागमन, प्लान्ट क्वारेन्टाइन, सशस्त्र सीमा बल (एसएसबी) लगायत विभिन्न विभागका अधिकारी तथा कर्मचारीहरूको उत्साहपूर्ण सहभागिता रहेको थियो। कार्यक्रममा प्रभातकुमार जना, राहुल गुप्ता, श्यामबाबु सिंह, सुरेशचन्द्र वर्मा, अख्तर सैफी, नारायणकुमार, कुन्दनकुमार पाण्डेय, प्रदीपकुमार दास, सुरभि कुमारी, प्रिया रानी, कुमारी नीतु, लक्ष्मी कुमारी, श्वेता कुमारी, रिंकु कुमारी, प्रकाश कुमारी, शुभमकुमार र सन्तोषकुमारलगायत सहभागी थिए। भारत विकास परिषद् रक्सौल शाखाका अध्यक्ष रजनीश प्रियदर्शी तथा सञ्चारमाध्यम संयोजक बिमल कुमार सर्राफ पनि आफ्ना सहकर्मीहरूसहित उपस्थित हुनुहुन्थ्यो।
कार्यक्रमको विशेष आकर्षण आसपासका गाउँबाट आएका विद्यालयका बालबालिकाहरूको सक्रिय सहभागिता रहेको थियो। बालबालिकाहरूले उत्साहपूर्वक समारोहमा सहभागी हुँदै स्वतन्त्रता दिवसको उल्लासलाई थप बढाएका थिए।
कार्यक्रमको अन्त्यमा भूमि पत्तन रक्सौलका पत्तन प्रशासक कुमार राजीव रञ्जनले धन्यवाद ज्ञापन गर्नुभयो। उहाँले प्रमुख अतिथि, नेपालबाट सहभागी अतिथि, सुरक्षा निकाय, विभिन्न विभागका अधिकारी, सञ्चारकर्मी, भारत विकास परिषद्का सदस्य तथा स्थानीय बालबालिकाप्रति आभार व्यक्त गर्नुभयो। राष्ट्रभक्ति र भारत–नेपाल मैत्रीको सन्देशसहित समारोह गरिमामय रूपमा सम्पन्न भएको थियो।
