पर्सा निर्वाचन क्षेत्र नम्बर २ बाट नवनिर्वाचित सांसद सुशील कुमार कानुले आँफुले विद्यालय शिक्षा लिएको विद्यालयमा पुगेर गुरुहरुबाट आशीर्वाद लिएका छन् ।
वीरगन्ज महानगरपालिका वडा नम्बर १० मा अवस्थित रामचरण साह पन्नालाल माध्यमिक विद्यालयमा बिहीबार पुगेर कानुले त्यहाँ अध्यापनरत शिक्षक–शिक्षिकाहरुबाट आशीर्वाद लिएका हुन् ।
त्यसअवसरमा उक्त विद्यालयका शिक्षक–शिक्षिका र विद्यार्थीहरुले नवनिर्वाचित सांसद कानुलाई भव्य स्वागत गर्दै दोशल्ला ओढाएर कदरपत्र प्रदान गर्दै सम्मानितपनि गरेका छन् ।कानुले रामचरण साह पन्नालाल माध्यमिक विद्यालयमै पढेर एसएलसीसम्मको अध्ययन पुरा गरेका थिए ।
गुरुहरुबाट आशीर्वाद र सम्मान ग्रहण गर्दै नवनिर्वाचित सांसद कानुले आँफुले शिक्षा दिक्षा लिएको विद्यालयले गरेको सम्मानले भावुक बनेको भन्दै विद्यालयले आँफुमाथि थप जिम्मेवारी बोकाइदिएको प्रतिक्रिया दिए । सांसदमा निनर्वाचित भएपछि आँफु पढेको विद्यालयमा गएर गुरुजनहरुबाट आशीर्वाद लिने इच्छा भएर नै आँफु सबैभन्दा पहिले आज विद्यालयमा आएको उनले बताए ।
उनले आफ्नै वडामा रहेको र आँफुले पढेको विद्यालयप्रति छुट्टै माया र आत्मीयता रहेको भन्दै विद्यालयको स्तरोन्नत्ती र शैक्षिक गुणस्तर अझ राम्रो बनाउनका लागि संघीय सांसदको हैसियतमा हुनसक्ने सबै सहयोग गर्ने प्रतिबद्धतापनि जनाए । उनले भने,‘ यो विद्यालय र यहाँका गुरुजनहरुकै कारण म आज यहाँसम्म आइपुगेको छु । हिजो वडाध्यक्षको जिम्मेवारीमा रहदाँँपनि यो विद्यालय मेरो प्राथमिकतामा थियो नै । अब संघीय सांसद बन्दै गरेको अवस्थामा पनि मैले आफ्नो यो विद्यालयलाई अझ प्राथमिकतामा राख्नेछु ।’
उक्त कार्यक्रममा सहभागी विद्यालयका विद्यार्थीहरुलाई इंगित गर्दै शिक्षक–शिक्षिकहरुले यहि विद्यालयमा पढेका कानु कार्यपालिका सदस्य , वडाध्यक्ष हुदैं आज सांसदजस्तो उच्च पदमा पुग्न सफल भएको उदाहरण दिदैं लगनशील भएर पढ्न सुझाव दिए ।
उनिहरुले विद्यालयको भौतिक र शैक्षिक गुणस्तरलाई अझ राम्रो बनाउन आफ्नो तर्फबाट हुनसक्ने पहल र प्रयास गरिदिन नवनिर्वाचित सांसद कानुसंग आग्रहपनि गरे ।
विद्यालयकी सहायक प्रधानाध्यापक जुली कर्णकोे अध्यक्षतामा भएको उक्त कार्यक्रममा विद्यालय व्यवस्थापन समितिका सदस्य, शिक्षक विनोद गिरि, लक्ष्मीनारायण साह लगायतकाकोपनि सहभागिता थियो ।
