नवनियुक्त प्रहरी महानिरीक्षक (आईजीपी) डा. मनोज कुमार केसीले नागरिकले प्रहरीलाई देख्दा डर होइन, भरोसा महसुस गर्ने वातावरण निर्माण गर्ने प्रतिबद्धता व्यक्त गरेका छन् ।
गृह मन्त्रालयमा आयोजित दर्ज्यानी चिह्न सुशोभन समारोहमा बोल्दै उनले आफ्नो कार्यकाललाई ‘मैले के पाएँभन्दा पनि नेपाली जनतालाई के दिन सकेँ’ भन्ने आधारमा मूल्यांकन गर्ने बताए ।
दर्ज्यानी चिह्नलाई काँधमा थपिएको अलंकार मात्र नभई राज्य, जनता र सात दशक लामो इतिहास बोकेको प्रहरी संगठनप्रतिको भरोसाका रूपमा लिएको केसीले बताए ।
संगठनभित्रका आन्तरिक चुनौती र समस्यालाई नजिकबाट नियालेको बताउँदै आईजीपी केसीले तल्लो तहका प्रहरी कर्मचारी (जवान र हवल्दार) का गुनासा सुन्न तत्काल छुट्टै संयन्त्र बनाउने घोषणा गरेका छन् ।
‘आधारभूत तहलगायत सम्पूर्ण प्रहरी कर्मचारीका गुनासा सुन्ने एउटा संयन्त्र सचिवालयमै प्राथमिकताका साथ सञ्चालन गर्नेछौँ,’ उनले भने ।
प्रहरीको लामो कार्यघण्टा, स्रोतसाधन तथा भौतिक पूर्वाधारको अभाव, सरुवा–बढुवामा निष्पक्षता र मानसिक स्वास्थ्यजस्ता विषयमा प्रणालीगत सुधार गर्दै लैजाने उनले प्रतिबद्धता जनाए ।
प्रहरी संगठनको एक्लो प्रयासले मात्र पूर्ण शान्ति सुरक्षा कायम गर्न सम्भव नहुने भन्दै केसीले सरकार, राजनीतिक दल, सञ्चारमाध्यम र नागरिकको सहयोगको अपेक्षा गरेका छन् । आधुनिक प्रहरीको सबैभन्दा ठूलो पुँजी नै जनतासँगको सम्बन्ध भएको उनले बताए ।
उनले भने, ‘म नेपाल सरकारसँग आवश्यक स्रोतसाधन, कानुनी स्पष्टता र कार्यगत स्वायत्तता तथा राजनीतिक दलहरूसँग प्रहरीलाई दलीय प्रभावबाट मुक्त राख्न सहयोगको विनम्र आग्रह गर्दछु ।’
सञ्चार जगतलाई पनि प्रहरीका कमजोरीसँगै राम्रा कामलाई समेत स्थान दिन उनले आग्रह गरे।
