रक्सौल, पूर्वी चम्पारण
सामाजिक कार्यकर्ता तथा लायन्स क्लब अफ रक्सौलका अध्यक्ष एवं मिडिया इन्चार्ज, साथै भारत विकास परिषद् रक्सौलका सेवा संयोजक एवं मिडिया इन्चार्ज बिमल सर्राफले सुखी जीवनका लागि सकारात्मक सोच, असल व्यवहार र आत्मसुधार आवश्यक रहेको बताएका छन्।
प्रेससँग कुरा गर्दै उनले भने, “तपाईंले चाहे पनि सबै मानिसहरूको धारणा परिवर्तन गर्न सक्नुहुन्न। त्यसैले अरूलाई बदल्ने प्रयासभन्दा आफ्नै जीवन शान्तिपूर्वक र खुसीसाथ बिताउनु नै बुद्धिमानी हुन्छ।”
उनका अनुसार संसारले व्यक्तिको प्रयासभन्दा पनि अन्ततः नतिजालाई सम्मान गर्ने भएकाले आफ्नो लक्ष्यप्रति इमानदार भएर निरन्तर मेहनत गर्नुपर्छ। उनले जीवनमा प्रतिष्ठाको विशेष महत्व रहेको उल्लेख गर्दै प्रतिष्ठा मानिसभन्दा पनि लामो समयसम्म जीवित रहने सम्पत्ति भएको बताए।
सर्राफले विचार र व्यवहार नै व्यक्तिको वास्तविक सुन्दरता भएको उल्लेख गर्दै भने, “जसरी रूखको सौन्दर्य फूल र पातमा निर्भर हुन्छ, त्यसरी नै मानिसको सौन्दर्य उसको सोच र व्यवहारमा निर्भर हुन्छ।”
उनले कठिन परिस्थितिमा मानिस प्रायः एक्लो हुने भएकाले समस्याको समाधानका लागि आफ्ना कमजोरी र गल्तीहरू सच्याउनुपर्ने धारणा राखे। “रोग निको पार्न औषधि आवश्यक परेझैँ जीवनका चुनौती पार गर्न आत्मसुधार आवश्यक हुन्छ,” उनले भने।
अरूको खुसीमा खुसी हुन र समाजमा सकारात्मकता फैलाउन आग्रह गर्दै उनले प्रकृतिले पनि अरूको खुशीको ख्याल राख्ने व्यक्तिको खुशीको ख्याल राख्ने बताए। “हामीले जे बाँड्छौं, अन्ततः त्यही कुरा फर्केर आउँछ। खुशी बाँड्नेले खुशी पाउँछ, दुःख बाँड्नेले दुःख,” उनको भनाइ थियो।
अन्त्यमा उनले शब्दहरूको प्रयोगमा विशेष सावधानी अपनाउनुपर्ने सुझाव दिँदै शब्दहरू सम्बन्ध जोड्ने र बिगार्ने दुवै शक्ति राख्ने बताए। “शब्दहरू सूचनामूलक मात्र होइनन्, प्रभावशाली पनि हुन्छन्। त्यसैले बोल्नुअघि सोच्नु आवश्यक छ,” उनले जोड दिए।
