वीरगञ्ज । झुटा तथा किर्ते कागजात पेस गरी नेपाली नागरिकता लिएको आरोपमा विवादमा तानिएका शंकर मित्तल पछिल्लो समय पुनः विवादमा परेका छन्। मित्तलविरुद्ध जिल्ला प्रशासन कार्यालय, बारामा नागरिकतासम्बन्धी उजुरी परेपछि विषयमा छानबिन भइरहेको बताइएको छ। मित्तलमाथि भारत र नेपाल दुवै देशको नागरिकता लिएको आरोपसमेत लाग्दै आएको छ।
यसैबीच, मित्तलमाथि वीरगञ्जका उद्योगी तथा व्यवसायी निरञ्जन अग्रवाललाई फसाउन खोजेको आरोप लागेको छ। अग्रवालले आफूले पाउनुपर्ने रकमबापत मित्तलले आपसी समझदारी र सौहार्दपूर्ण वातावरणमा चेक दिएको तर अहिले आएर सोही चेकको विषयलाई लिएर प्रहरीमा उजुरी गरी आफूलाई फसाउने प्रयास गरेको आरोप लगाएका छन्।
अग्रवालका अनुसार मित्तलले आफूले तिर्नुपर्ने रकम बराबरको चेक आफैं उपलब्ध गराएका थिए। सोही चेकका आधारमा आफूले रकम असुल गर्नुपर्ने अवस्थामा उल्टै जिल्ला प्रहरी कार्यालय, पर्सामा उजुरी परेको भन्दै उनले आपत्ति जनाएका छन्।
आफैंले दिएको चेक चोरी भएको वा दुरुपयोग भएको दाबी गर्दै उजुरी परेको जानकारी पाएपछि आफू आश्चर्यमा परेको अग्रवालले बताएका छन्। यसअघि पनि विभिन्न बिचौलियामार्फत आफूविरुद्ध मुद्दा तथा जालझेल गर्ने प्रयास हुँदै आएको उनको दाबी छ।
अग्रवालका अनुसार पछिल्लो समय मित्तलसँग बाटोघाटोमा भेट हुँदा समेत सामान्य र सौहार्दपूर्ण कुराकानी हुने गरेको थियो। केही दिनअघि मात्रै आफूहरूबीच भेटघाट तथा कुराकानी भएको र त्यसको भिडियोसमेत आफूसँग सुरक्षित रहेको उनले दाबी गरेका छन्।
अग्रवालले भने, “हामी मिलेर आ–आफ्नो कारोबार गरौँ, हामीबीच रहेको लेनदेनको विषय आपसी सहमतिमा मिलाऔँ र अड्डा–अदालतबाट पछि हटौँ” भन्दै मित्तलले आफूलाई दिनुपर्ने रकम बराबरको चेक दिएको दाबी गरे।
तर अहिले आएर सोही विषयलाई लिएर आफूविरुद्ध झुटो मुद्दा लगाउने प्रयास भइरहेको जानकारी सञ्चारमाध्यमबाट पाएको उनले बताए। मित्तलसँग आफ्नो कुनै व्यक्तिगत दुश्मनी वा द्वेष नरहेको बताउँदै अग्रवालले पछिल्लो घटनाक्रमबाट आफू चकित भएको प्रतिक्रिया दिएका छन्।
अग्रवालले मित्तल बिचौलियाको उक्साहटमा पुनः आफूविरुद्ध लागेको आरोपसमेत लगाएका छन्। यद्यपि, यी आरोपहरूबारे मित्तलको पक्षबाट आएको स्पष्ट प्रतिक्रिया सार्वजनिक रूपमा उपलब्ध स्रोतमा देखिएको छैन।
यता, जिल्ला प्रहरी कार्यालय, पर्साका प्रवक्तासमेत रहेका प्रहरी नायब उपरीक्षक चक्रबहादुर मल्लले प्रहरीमा उजुरी परेको र घटनासम्बन्धी विषयमा छानबिन भइरहेको बताएका छन्। चेक के–कस्तो कारोबारका लागि दिइएको थियो भन्ने विषय अनुसन्धानबाट खुल्ने भन्दै उनले दोषी देखिए आवश्यक कानुनी कारबाही गरिने बताए।
मित्तलमाथि नागरिकता विवादका साथै अन्य व्यावसायिक विषयमा समेत आरोपहरू सार्वजनिक हुँदै आएका छन्। पछिल्लो घटनाक्रमले भने व्यवसायिक कारोबारमा चेकको प्रयोग, त्यसको विश्वसनीयता तथा चेक दिएपछि उत्पन्न हुने कानुनी विवादबारे वीरगञ्जका व्यवसायी वृत्तमा समेत चर्चा बढाएको छ।
