भारतका प्रधानमन्त्री नरेन्द्र मोदीले नेपालमा हालैको अविरल वर्षापछि आएको बाढी, पहिरो तथा त्यसबाट भएको जनधनको क्षतिप्रति गहिरो दुःख व्यक्त गरेका छन्। सामाजिक सञ्जालमार्फत एक सन्देश जारी गर्दै उनले भारत सरकार नेपालको जुनसुकै आवश्यकतामा साथ दिन तयार रहेको स्पष्ट पारेका छन्।
‘नेपालमा हालैको विपत्तिमा भएको जनधनको क्षति अत्यन्तै पीडादायक छ,’ मोदीले लेखेका छन्, ‘एक मित्रराष्ट्र र पहिलो प्रतिक्रियाकर्ताको रूपमा भारत आवश्यक सहयोग गर्न प्रतिबद्ध छ।’
प्रधानमन्त्री मोदीले नेपाल र भारतबीचको गहिरो सम्बन्धको स्मरण गर्दै दु:खद घडीमा भारतीय जनताका तर्फबाट नेपाली जनता र सरकारसँग ऐक्यबद्धता प्रकट गरेका छन्। ‘हामी यस कठिन घडीमा नेपाली दाजुभाइ तथा दिदीबहिनीहरूको साथमा छौं,’ उनको भनाइ छ।
नेपालमा गत शुक्रबारदेखि शनिबारसम्म परेको भारी वर्षापछि देशका विभिन्न भागमा बाढी तथा पहिरो जाँदा ४९ जनाको मृत्यु भइसकेको छ भने कैयौं परिवार प्रभावित भएका छन्। केही दिनदेखि लगातार बन्द रहेका प्रमुख राजमार्गहरू क्रमिक रूपमा खुल्न थालेका छन्, जसले राहत तथा उद्धार कार्यमा सहजता ल्याउने अपेक्षा गरिएको छ।
प्राकृतिक विपत्तिको सामना गर्न भारत र नेपालबीचको सहकार्यले दुःखद परिस्थितिमा समेत एक सकारात्मक सन्देश दिएको छ।
