धोबिनी गाउँपालिकाका लेखा प्रमुख सोनु कुमारमाथि सार्वजनिक रकम प्रयोग गरी स्कुटी खरिद गरेको आरोप लागेपछि स्थानीय स्तरमा विवाद चर्किएको छ। उक्त विषय सार्वजनिक भएसँगै स्थानीयवासीले निष्पक्ष छानबिन गरी सत्यतथ्य बाहिर ल्याउन माग गरेका छन्।
स्थानीय स्रोतका अनुसार गाउँपालिकाको खाताबाट रकम निकालेर स्कुटी खरिद गरिएको आरोप लगाइएको छ। खरिद गरिएको भनिएको स्कुटी हालसम्म पनि नम्बर प्लेटविहीन अवस्थामा सञ्चालन भइरहेको दाबी गरिएको छ। यस घटनापछि स्कुटी खरिदको प्रक्रिया, स्वामित्व र प्रयोगको उद्देश्यबारे विभिन्न प्रश्न उठ्न थालेका छन्।
स्थानीयवासीहरूले सार्वजनिक निकायको रकम खर्च गर्दा पूर्ण पारदर्शिता र जवाफदेहिता आवश्यक हुने भन्दै यदि गाउँपालिकाको रकमबाट स्कुटी खरिद गरिएको हो भने त्यससम्बन्धी सम्पूर्ण विवरण सार्वजनिक गर्न माग गरेका छन्। साथै स्कुटी सरकारी प्रयोजनका लागि खरिद गरिएको हो वा व्यक्तिगत प्रयोगका लागि भन्ने विषय पनि स्पष्ट हुनुपर्ने उनीहरूको भनाइ छ।
सार्वजनिक पदमा रहेका कर्मचारीले जनताको करबाट संकलित रकमको जिम्मेवार र कानुनी ढंगले उपयोग गर्नुपर्ने दायित्व रहेको उल्लेख गर्दै स्थानीय अगुवाहरूले सम्बन्धित निकायलाई घटनाबारे गम्भीर छानबिन गर्न आग्रह गरेका छन्।
उनीहरूले आरोप सत्य ठहरिए कानुनबमोजिम कारबाही हुनुपर्ने र आरोप निराधार भए सम्बन्धित पक्षले तथ्यसहित स्पष्टिकरण दिनुपर्ने बताएका छन्।
यस विषयमा लेखा प्रमुख सोनु कुमार तथा धोबिनी गाउँपालिकाको आधिकारिक प्रतिक्रिया भने प्राप्त हुन सकेको छैन। प्रतिक्रिया प्राप्त भए सोसमेत समेटिनेछ।
