पर्सा निर्वाचन क्षेत्र नं. १ मा यसपटकको प्रतिनिधिसभा निर्वाचन निकै रोचक मोडमा पुगेको छ। नेपाली कांग्रेसका उम्मेदवार अनिल रुङटा र नेकपा (एमाले) का नेता प्रदीप यादव बीच मुख्य प्रतिस्पर्धा हुने देखिएको छ। तर पछिल्ला दिनहरूमा देखिएको राजनीतिक माहोल र स्थानीय प्रतिक्रिया हेर्दा कांग्रेस उम्मेदवार रुङटाको पक्षमा जनमत क्रमशः बलियो बन्दै गएको संकेत मिलेको छ।
स्थानीय स्तरमा विभिन्न चिया पसल, चौतारी र बजार क्षेत्रमा हुने राजनीतिक छलफलमा अनिल रुङटाको नाम प्रमुख रूपमा उठ्न थालेको छ। विशेषगरी अघिल्लो निर्वाचनमा स्वतन्त्र उम्मेदवारका रूपमा कडा प्रतिस्पर्धा गरेका अजय दिवेदी यसपटक खुला रूपमा अनिल रुङटाको समर्थनमा उभिनुले चुनावी समीकरणमा ठूलो प्रभाव पारेको स्थानीयहरूको भनाइ छ।
अघिल्लो निर्वाचनमा दिवेदी र यादवबीच कडा टक्कर भएको थियो। स्वतन्त्र उम्मेदवार हुँदाहुँदै पनि अजय दिवेदीले प्रदीप यादवलाई कडा चुनौती दिएका थिए र अन्तिम क्षणमा झिनो मतान्तरले मात्र पराजित भएका थिए। त्यही अनुभव र प्रभाव अहिले अनिल रुङटाको पक्षमा जोडिएको देखिन्छ।
उता, एमाले उम्मेदवार प्रदीप यादवको बारेमा स्थानीय स्तरमा मिश्रित प्रतिक्रिया देखिन थालेको छ। मधेस आन्दोलनबाट उदाएका नेता यादवले मधेसी हक–अधिकारको एजेन्डाबाट चुनाव जिते पनि अहिले आएर एमालेबाट उम्मेदवारी दिनुले आफ्नै आधार मतदातामा असन्तोष पैदा भएको कतिपय स्थानीयको बुझाइ छ। “मधेसी मुद्दाबाट जितेका नेता अहिले त्यही मुद्दा छाडेर फरक धारमा गएको अनुभूति भयो,” भन्ने आवाज बजारमा सुनिन थालेको छ।
यसको विपरीत, अनिल रुङटालाई एक संयमी, पहुँचयोग्य र विकासमुखी नेता का रूपमा हेरिएको छ। कांग्रेसको संगठन, स्थानीय समर्थन र स्वतन्त्र प्रभावशाली व्यक्तिहरूको साथले रुङटाको चुनावी अभियानलाई थप बल पुगेको देखिन्छ।
स्थानीय राजनीतिक विश्लेषकहरूका अनुसार अहिलेको माहोल, गठजोड र मतदाताको मनोविज्ञान हेर्दा पर्सा–१ मा अनिल रुङटाको जितको सम्भावना बलियो बन्दै गएको छ। यद्यपि अन्तिम निर्णय मतदाताकै हातमा रहने भए पनि अहिलेको चुनावी वातावरणले कांग्रेस उम्मेदवार रुङटालाई स्पष्ट लाभ पुगेको संकेत गर्छ।
