वीरगञ्ज । पर्साको इलाका प्रहरी कार्यालय पटेर्वा सुगौलीमा कार्यरत प्रहरी अधिकारी तथा उनीहरूको मातहतमा परिचालित सादा पोसाकका प्रहरी कर्मचारीको कार्यशैली पुनः विवादमा परेको छ। प्रहरी निरीक्षक सम्मुनत अधिकारीको मातहतमा परिचालित घुमुवा प्रहरी पप्पु पण्डितलाई एक लाख रुपैयाँ अवैध रूपमा असुली गरेको आरोपमा जिल्ला प्रहरी कार्यालय पर्साले नियन्त्रणमा लिएपछि प्रहरीको आन्तरिक कमान्ड तथा नियन्त्रण प्रणालीमाथि प्रश्न उठेको छ।
पण्डित पछिल्लो तीन दिनदेखि जिल्ला प्रहरी कार्यालय पर्साको नियन्त्रणमा रहेको बताइएको छ। यसअघि पनि प्रहरी निरीक्षक अधिकारीले सादा पोसाकमा परिचालन गरेका प्रहरी जवान श्रीलाल मण्डल र सुशील मण्डल गैरकानुनी रूपमा रकम असुली गरेको आरोपमा जिल्ला तानिएका थिए।
पटक–पटक एउटै प्रकृतिका आरोपमा घुमुवा प्रहरी विवादमा पर्न थालेपछि इलाका प्रहरी कार्यालय पटेर्वा सुगौलीको कार्यशैलीमाथि स्थानीयस्तरमा प्रश्न उठ्न थालेको हो।
स्थानीयका अनुसार प्रहरी निरीक्षक सम्मुनत अधिकारीको नेतृत्वमा परिचालित सादा पोसाकका प्रहरी कर्मचारीमार्फत रकम असुली भइरहेको गुनासो यसअघि पनि आउने गरेको थियो। यस्ता घटनाले प्रहरी संगठनको छविमाथि असर परेको स्थानीयको भनाइ छ।
एक लाख रुपैयाँ असुलीको आरोप
स्थानीय स्रोतका अनुसार असोज १३ गते साँझ सखुवा प्रसौनी गाउँपालिकास्थित मधुवनमथवलका लक्ष्मण सहनी आफ्नो पोखरीमा माछा छाड्ने तयारीमा थिए। सोही क्रममा मनवा बजारबाट फर्किंदै गरेका प्रहरी निरीक्षक सम्मुनत अधिकारीले सहनीलाई प्रहरी चौकी रंगपुर जान भनेको बताइएको छ।
सहनीले कारण सोध्दा ‘चेकजाँचसम्बन्धी उजुरी परेको’ भन्दै छलफलका लागि जानुपर्ने बताइएको स्थानीय स्रोतको दाबी छ। आफूविरुद्ध कुनै आधिकारिक उजुरी नरहेको भन्दै सहनीले जान अस्वीकार गरेपछि उनलाई हत्कडी लगाएर लैजाने चेतावनी दिइएको दाबीसमेत गरिएको छ।
त्यसपछि सहनी प्रहरी चौकी रंगपुर पुगेको र उनलाई छुटाउन आफन्तसँग दुई लाख रुपैयाँ मागिएको स्थानीय स्रोतको दाबी छ।
यसैबीच घुमुवा प्रहरी पप्पु पण्डितमार्फत बुझाइएको रकममध्ये केही रकम फिर्ता भएको र बाँकी रकम पण्डितको साथबाट बरामद भएको दाबी गरिएको छ। रकम बरामद भएपछि घटनाबारे एक प्रहरी कर्मचारीले जिल्ला प्रहरी प्रमुख पवनकुमार भट्टराईलाई जानकारी गराएको बताइएको छ।
घटनासँगै सहनीको पोखरीबाट प्रहरीले रहु माछासमेत लगेको आरोप स्थानीयस्तरमा लागेको छ। ‘जिल्लाबाट पक्राउ तथा अनुसन्धान गर्न आदेश आएको छ’ भन्दै नामावली देखाएर रकम असुली गर्ने गरिएको आरोपसमेत स्थानीयले लगाएका छन्।
गुनासोपछि घुमुवा प्रहरी जिल्ला तानिए
घटनाबारे उजुरी तथा गुनासो आएपछि पर्सा प्रहरीले घुमुवा प्रहरी पप्पु पण्डितलाई जिल्ला तानेको बताइएको छ। उनीमाथि लागेको आरोपबारे छानबिन तथा अनुसन्धान भइरहेको जनाइएको छ।
तर प्रहरी निरीक्षक सम्मुनत अधिकारीमाथि भने तत्काल कुनै विभागीय कारबाही भएको स्पष्ट जानकारी सार्वजनिक भएको छैन। मातहतका प्रहरी कर्मचारीमाथि कारबाही प्रक्रिया अघि बढे पनि कमान्ड तहमा रहेका अधिकारीमाथि भने किन कारबाहीमा ढिलाइ भइरहेको छ भन्ने प्रश्न स्थानीयस्तरमा उठेको छ।
स्थानीयका अनुसार प्रहरी निरीक्षक अधिकारीको कार्यशैलीबारे यसअघि पनि जिल्ला प्रहरी नेतृत्वसमक्ष गुनासो पुगेको थियो। पटक–पटक घुमुवा प्रहरी विवादमा परे पनि सम्बन्धित प्रहरी निरीक्षकमाथि भने कारबाही नभएको आरोप स्थानीयको छ।
सीमावर्ती क्षेत्रमा प्रहरीको भूमिकामाथि प्रश्न
पटेर्वा सुगौली तथा सीमावर्ती क्षेत्रमा हुने तस्करी र अन्य अवैध गतिविधि नियन्त्रणमा प्रहरीको भूमिकामाथिसमेत स्थानीयले प्रश्न उठाउन थालेका छन्। उनीहरूले प्रहरीको निगरानी, अनुसन्धान तथा कारबाही प्रक्रिया निष्पक्ष र पारदर्शी हुनुपर्ने माग गरेका छन्।
घटनाबारे जिल्ला प्रहरी प्रशासनको विस्तृत आधिकारिक धारणा तथा प्रहरी निरीक्षक सम्मुनत अधिकारीमाथि हुने सम्भावित विभागीय कारबाहीबारे भने स्पष्ट जानकारी सार्वजनिक भएको छैन।
यस घटनामा लगाइएका आरोपहरूको स्वतन्त्र पुष्टि हुन बाँकी छ। सम्बन्धित प्रहरी अधिकारी तथा कर्मचारीको आधिकारिक धारणा र छानबिनको निष्कर्षपछि मात्र घटनाको वास्तविकता स्पष्ट हुनेछ। आरोप पुष्टि भएमा सम्बन्धित कर्मचारीमाथि प्रचलित कानुन तथा प्रहरी नियमावलीअनुसार कारबाही हुने अपेक्षा गरिएको छ। साभार : मधेशदृष्टि
