रक्सौल। विद्यार्थीहरूमा भारतीय इतिहास, संस्कृति, गौरवशाली सम्पदा, राष्ट्रिय मूल्य–मान्यता तथा देशका उपलब्धिप्रति जागरूकता बढाउने उद्देश्यले भारत विकास परिषद्ले आयोजना गर्दै आएको ‘भारतलाई चिनौँ’ सामान्य ज्ञान प्रतियोगिताको अखिल भारतीय लिखित परीक्षा आगामी ३१ अगस्टमा हुने भएको छ।
परिषद्का देशभर रहेका करिब १ हजार ६ सय शाखामार्फत सञ्चालन हुने प्रतियोगिताअन्तर्गत रक्सौल शाखाका १० विद्यालयका ४०० भन्दा बढी विद्यार्थी कनिष्ठ र वरिष्ठ वर्गमा सहभागी हुनेछन्।
प्रतियोगिताका लागि परिषद्ले तयार पारेको ‘भारतलाई चिनौँ’ पुस्तकको हिन्दी तथा अंग्रेजी संस्करण सम्बन्धित सबै विद्यालयमा निःशुल्क वितरण गरिसकिएको छ। विद्यालय व्यवस्थापनबाट प्राप्त सहयोग तथा विद्यार्थीहरूको उत्साहका कारण परीक्षा सञ्चालनका लागि सकारात्मक वातावरण बनेको छ।
भारत विकास परिषद् रक्सौल शाखाका अध्यक्ष रजनीश प्रियदर्शी तथा संस्कार संयोजक नितेश कुमार सिंहले ‘भारतलाई चिनौँ’ अभियानले विद्यार्थीहरूलाई देशको गौरवशाली इतिहास, संस्कृति र परम्परासँग जोड्ने महत्वपूर्ण भूमिका निर्वाह गरिरहेको बताए।
रक्सौल शाखाअन्तर्गत क्याम्ब्रिज पब्लिक स्कुल, सेन्ट माइकल इङ्लिस स्कुल, एस.ए.भी. स्कुल, सरस्वती विद्या मन्दिर, चन्द्रशील इङ्लिस स्कुल, जयन्त एकेडेमी, एम.जी.एम. इन्टरनेसनल स्कुल, भारती पब्लिक स्कुल, डी.पी.एम. स्कुल तथा एम.के. मिसन आवासीय विद्यालय, भलुवहिया, रामगढवाका विद्यार्थी परीक्षामा सहभागी हुनेछन्।
परीक्षा पारदर्शी र व्यवस्थित रूपमा सञ्चालन गर्न प्रत्येक विद्यालयमा शाखाका एक–एक जना सदस्यलाई पर्यवेक्षकका रूपमा खटाइनेछ। परीक्षा सञ्चालनसम्बन्धी सम्पूर्ण तयारी पूरा भइसकेको शाखाले जनाएको छ।
प्रतियोगितामा कक्षा ६ देखि ८ सम्मका विद्यार्थी कनिष्ठ वर्ग तथा कक्षा ९ देखि १२ सम्मका विद्यार्थी वरिष्ठ वर्गमा सहभागी हुनेछन्। लिखित परीक्षामा सहभागी सबै विद्यार्थीलाई शाखाको तर्फबाट प्रशंसापत्र प्रदान गरिनेछ।
प्रत्येक विद्यालयबाट कनिष्ठ र वरिष्ठ वर्गमा प्रथम तथा द्वितीय स्थान हासिल गर्ने विद्यार्थी शाखास्तरीय प्रश्नमञ्च अर्थात् क्विज प्रतियोगितामा सहभागी हुन योग्य हुनेछन्। शाखास्तरीय प्रश्नमञ्चमा दुवै वर्गबाट प्रथम तथा द्वितीय स्थान हासिल गर्ने विद्यार्थीले आगामी प्रान्तीय प्रतियोगितामा सहभागी हुने अवसर प्राप्त गर्नेछन्। उनीहरूलाई प्रशंसापत्रसहित प्रतीक चिह्न प्रदान गरी सम्मान गरिनेछ।
शाखाका सचिव नरेश कुमारले विद्यालय व्यवस्थापन, शिक्षक तथा विद्यार्थीबाट प्राप्त सहयोगका कारण परीक्षा सञ्चालनका लागि उत्साहजनक वातावरण बनेको बताए। परिषद्को उद्देश्य बढीभन्दा बढी विद्यार्थीलाई ज्ञान, संस्कार र राष्ट्रबोधसँग जोड्नु रहेको उनले बताए।
सम्पर्क संयोजक उमेश सिकरिया तथा सेवा संयोजक एवं सञ्चार प्रभारी बिमल कुमार सर्राफले परीक्षामा सहभागी प्रत्येक विद्यार्थीलाई प्रशंसापत्र प्रदान गरिने जानकारी दिए।
उनका अनुसार परीक्षा सफल र निष्पक्ष रूपमा सञ्चालन गर्न विद्यालय व्यवस्थापनसँग समन्वय, प्रश्नपत्र तथा परीक्षा सामग्रीको व्यवस्था र पर्यवेक्षकको तैनाथीलगायत आवश्यक सबै तयारी पूरा गरिएको छ।
